政情：大舞台：洪克偉寸嘴 叫人睇圖點人數

每逢舉辦大型遊行，警方公布嘅遊行人數往往同主辦單位公布嘅人數差一大截，大家都好想知警方點樣點算人數，係咪有意報細數淡化遊行。警務處行動處處長洪克偉尋日喺電台節目上話，警方每次都會喺遊行路線沿途選擇幾個地點，從高位點算遊行人數，點到幾多就幾多，而每次點算嘅人數都同一啲學者或機構點算嘅數字相若。

佢仲建議大家攞支大頭針，從報章嘅遊行圖片數數啲人頭就知道遊行人數有幾多喎，真係噏得就噏。