政情：鄧家彪不戰而勝講風涼話
立法會廿八個傳統功能界別中，有幾個界別向來係經協調產生，唔使選都知結果。好似勞工界嗰三個位，由回歸至今都係兩席歸工聯會，一席歸勞聯。受惠協調而自動當選嘅工聯會立會新丁鄧家彪，尋日出席活動時自言其實習慣咗同人競爭，因為有競爭先有進步喎。畀啲依家仲喺五區直選同超級區會爭餐死嘅黨友聽到，難免會以為佢講緊風涼話。
唔提都唔記得，原來鄧家彪以前參加過多次立法會地區直選，○四年佢喺九龍東同「工聯票后」陳婉嫻同一名單參選，到○八年就轉戰新界西幫王國興抬轎，計埋今次原來已經係第三次參選。正所謂無功都有勞，今次佢獲工聯會推薦轉戰勞工界，即可不戰而勝，自動當選。佢形容直選有直選嘅好處，一來可以接觸唔同階層嘅街坊，二來有對手競爭，先可以逼到自己進步。須知工聯會內部規定兩名勞工界議員，做滿四年一屆後就必須轉戰直選，自生自滅，睇吓到時鄧家彪仲有無咁口響！