政情：直選論壇 泛民「違攻」謝偉俊
尋日有電台舉辦立法會九龍東直選論壇，為咗公平起見，電台特別安排以抽籤方式，決定候選人「互片」環節嘅提問同回答隊伍。但該區幾位泛民候選人卻集體違規，圍攻來自建制派嘅謝偉俊（阿Paul）。
公民黨梁家傑（袋巾傑）本來抽到質詢獨立泛民譚香文（Mandy），但佢嘅問題卻係覺唔覺得阿Paul係向西環借票、係假獨立。Mandy立即乘勢話擔心阿Paul聲稱專業獨立，其實就係保駕護航嘅建制派。輪到人民力量黃洋達質詢袋巾傑，佢又話唔明點解阿Paul身為律師，都會支持就雙非問題提請人大釋法。由於當時並非阿Paul接受質詢，無權發言反駁，只可啞忍。社民連陶君行更喺論壇完結時送咗一面「西環之子、精忠報黨」嘅錦旗畀佢，令阿Paul當堂黑面，拒接離開。
不過話說回來，阿Paul尋晚喺黃大仙舉行造勢大會，邀得全國政協王國強、王惠貞、周安達源、以及做過中聯辦嘅區議員黃春平出席，撐場陣營仲猛過唔少根正苗紅嘅建制派人士，佢話自己唔係西力撐，真係好難令人相信囉！參選九東嘅仲有民建聯陳鑑林、工聯會黃國健同獨立嚴鳳至名單。