政情：面對「棄保效應」 蔡耀昌懶鎮定
立法會選戰臨近，候選人有時掛住搶票，就算連黨友都無情講，好似上屆新界東民主黨（白鴿黨）黃成智同鄭家富為求自保，懶理黨友生死不停踩過界搶票，好彩最尾兩人險勝。今屆白鴿黨更加大想頭，派出三隊出戰新界東，除咗成智外，仲有劉慧卿及蔡耀昌（九哥），固有嘅票要平均分畀三人，真係難過登天，估計遲早又會內訌。
不過，最危嘅九哥就扮晒好有信心，話黨已經將新界東劃成三區，講到明河水不犯井水，唔會踩過界搶對方嘅票喎。
九哥話，自己會主攻大埔、成智留守北區、卿姐就轉戰西貢，至於另一大票倉沙田就會再細分。聽落好似天衣無縫，但選戰其中一招叫「棄保效應」，最尾白鴿黨分分鐘放棄九哥，呼籲選民落重飛到成智同卿姐身上。
新界東參選人仲有張超雄、田北俊、葉偉明、陳志全、范國威、何民傑、湯家驊、陳克勤、葛珮帆、梁安琪、龐愛蘭、方國珊、陳國強、龐一鳴、梁國雄、邱榮光。