政情：新民黨 仁濟主席極速撻着
成立咗唔夠兩年嘅新民黨，已經成為建制派一股新興勢力，從該黨嘅選舉策略睇得出佢哋野心唔細，有意擴闊政治版圖，但「三軍未動，糧草先行」，該黨嘅財力始終未能與大黨比併。為咗多幾條大水喉射住，近日有消息話新民黨誠邀仁濟醫院主席鄭承隆入黨，聽聞兩者一拍即合，但鄭承隆就唔想做顧問咁簡單，想該黨開多個副主席畀佢做，但呢頭親事最終能否成功，就要睇該黨一班中委肯唔肯喇。
新民黨發展迅速，雖然培育咗唔少政治人才，但打選戰同燒銀紙無乜分別，而資金方面正正係該黨最缺嗰樣。據聞該黨最大金主已經係主席葉劉淑儀自己，但一個人嘅財力始終有限，無番幾條大水喉射住，好易乾塘，所以有傳葉劉最近搵咗做翡翠買賣起家嘅鄭承隆入黨，希望借助佢嘅財力「潤澤」新民黨，喺選戰期間發揮作用。咁啱鄭承隆做咗慈善公益好多年，想嘗試喺政界發展，所以兩人一拍即合。
葉劉老實承認
政界就流傳兩種講法，第一個講法係鄭承隆嘅入黨要求係要做副主席，另一講法就係新民黨為咗吸引佢入黨，特別加開多個副主席位畀佢做。
我哋問過葉劉，該黨係咪將會有猛人加盟，佢都好老實承認，最近有位仁濟醫院頭頭入黨，仲大送高帽話，以呢個頭頭嘅人脈可以幫助新民黨唔少喎。至於係咪做副主席，葉太就話呢啲嘢要留畀黨中委拍板通過，唔可以自己一個話點就點。
不過，鄭承隆呢位政壇新丁要做副主席都唔係話咁易，聽聞有新民黨中人對呢件事都頗有微言，覺得佢無乜從政經驗，無理由一入黨就可以做副主席喎。
根據過往經驗，好少公益或慈善機構嘅頭頭會加入政黨，今次仁濟主席罕有地背負政黨背景，唔知其他總理會點睇呢？至於鄭承隆，由○四年開始加入仁濟醫院董事局，到○八年升至副主席，今年四月正式出任主席，但從政經驗就唔多，只係喺去年底參加過特首選舉委員會社福界別選舉，但最尾都低票落敗，如今仲想加入政黨，似乎佢喺政界發展嘅決心同野心都唔細。