中環出更：洪為民割息肉「無理取鬧」
菁英會主席洪為民（Witman）近日突然喺社交網站facebook留言話自己會無理取鬧，咩事令佢呢個大男人咁激氣呢？原來唔係有咩不快事，只係佢剛剛接受完切除聲帶息肉手術，暫時唔可以大聲講嘢，所以先幽自己一默話：「根據大聲代表有道理嘅原則，本人將進入『無理取鬧』期，敬希留意！」
其實Witman三月時已經聲沙沙咗成個月，直到五月感冒發燒睇醫生先至發現生息肉。本來醫生話要觀察多一個星期，等佢感冒好番再檢查，加上手術後五至七日都唔可以講嘢，搞到佢都猶豫割唔割息肉好，事關佢五至七月都好忙，工作排滿晒之餘，仲要幫老友競選錄音唱歌，所以拖到上周三先可以入院做手術。
Witman自嘲呢段時間樂得清淨，咁啱佢囝囝又去咗德國上暑期班，菁英會工作又有好兄弟楊華勇同梁宏正睇實，所以令佢有機會放吓暑假休息，經常睇書寫文章，雖然餐餐食粥，惟有當減肥囉。