中環出更：泌尿聖手搵真銀 高永文想幫襯
有「泌尿科聖手」之稱嘅前廣華醫院外科部主管葉維晉（Andrew），自立門戶搵真銀，佢位於中環嘅診所尋日開張大吉，城中名醫紛到賀，除咗名醫陳曦齡外，就連近日忙到極嘅食物及衞生局局長高永文，都以老同學身份撐場。男士人到中年少不免經歷「男人之苦」，高永文都自嘲要搵Andrew排定隊檢查，仲要求縮短輪候時間喎。
高永文一早到場，認真畀面，原來佢同Andrew相識三十六載，七六年齊齊入港大，當年同班同學仲有港大微生物學系講座教授袁國勇，三人連做功課都話要同一組，friend過打Band。Andrew又爆高永文當年係班代表，好敢言，當同學對分組做功課嘅安排有意見時，大家就推高永文出頭爭取，果然夠兄弟。
陳文綺慧鍾情旗袍
講番Andrew間診所有千幾呎，布置獨特，最矚目係特別整咗個玻璃飾櫃擺放陽具精品，有玉製，亦有石雕款式，總之花款多多，統統都係佢暢遊大江南北時搜羅回來。貴唔貴？Andrew笑言價錢合理。連收藏嗜好都離不開男人「那話兒」，唔通係職業病？
到賀嘅仲有前東華三院主席張佐華及現屆主席陳文綺慧（Viola），見Viola心情靚靚，原來佢啱啱去完上海訂造旗袍。佢鍾情旗袍夠端莊，希望嚟緊東華有大小活動都以旗袍Look示人，可惜香港難尋好師傅，呢次飛上海，一口氣造夠四套，夠晒滿足。
卓妮