港鐵港鐵，又係港鐵。功夫茶同大部分香港人一樣，始終唔明點解港鐵咁鬼死麻煩，動不動就砰嘭一嘢跪低。
呢嗱嗱嗱，港鐵唔知第幾次又故障嘞。尋日清晨六點左右，港鐵訊號系統電力供應發生問題，三大命脈觀塘線、荃灣線以及港島線列車服務受阻。列車服務於早上七時十五分開始，維持三至四分鐘一班，八點之後兩分半至三分鐘一班。服務受阻期間，九龍塘、金鐘同旺角站情況一度擠塞。
喂，服務受阻期間係上班上學嘅繁忙時間，打工仔萬一因為遲到而保唔住個飯碗，搵邊個算帳呀？港鐵話喎，服務受阻係由於切換電源嘅裝置失效，影響車務資訊指示系統運作，就此向乘客致歉。
致歉致歉，又係致歉。功夫茶同大部分香港人一樣，想問港鐵三個問題。第一個問題，唔好成日壞車得唔得？第二個問題，唔好成日加價得唔得？第三個問題，掠完水之後切切實實改善服務得唔得？
港鐵嘅水皮服務真係抵鬧o架，好似冇耐之前颱風襲港，八號、九號、十號風球高高掛，港鐵係就係維持東鐵線列車服務，不過突然之間又停車，大批乘客被迫通宵滯留車站，過咗一個風雨交加嘅無眠之夜。立法會議員當然狂插啦，狠批港鐵未有就東鐵線因風暴停駛造成嘅混亂而道歉，做法不能接受。
話港鐵掠水絕對冇老屈成分，呢一間由特區政府做大股東嘅公共交通機構完全唔講社會責任，舊年勁賺一百四十七億元，今年六月居然勢兇夾狼加價百分之五點四，激到全港小市民吹鬚睩眼。錢就賺到盡，價就加得快，之但係一講到改善服務質素咩，對唔住，一係冇改善，一係慢到嘔。講咗不知幾多年嘅安裝月台幕門，東鐵線居然要到二○二○年先至完成，唔想跌落路軌死得血肉模糊嘅乘客，仲要等多八年呀衰鬼！
安裝月台幕門拖拖拉拉，加設廁所亦係極度龜速。港鐵旺角、太子同金鐘站將於二○一五年底前加設洗手間，其餘七個轉線車站要到二○二○年底先至有廁所。興建廁所之嘛，又唔係打造航空母艦，竟然需要三至八年時間，服務質素簡直低過露出屁股嘅低腰褲。
運輸及房屋局局長張炳良話喎，預料港鐵票價調整機制將於本年底至明年初完成檢討，正聘用顧問公司全面檢視，研究是否有必要加入反映港鐵成本、盈利水平、市民負擔能力等等元素，甚至希望加入「服務質素」作為票價考慮。
計功夫茶話齋，好心港鐵唔好再扮烏龜啦，改善服務刻不容緩o架，否則唔該減價！