政情：潘德鄰承諾當全職議員
九月立法會醫學界功能界別選情激烈，尋日輪到骨科名醫潘德鄰報名參選，獲「骨科聖手」方津生、「男士救星」葉維晉等名醫撐場，而提名名單都粒粒皆星，包括香港大學醫學院院長李心平、港大微生物學系講座教授袁國勇等。他揚言一旦當選，將「瞓身」服務市民及業界，會成為首位全職醫學界議員。
對於選前被指與食物及衞生局局長高永文關係良好，標籤為「梁粉」，首次參選嘅潘醫生話，相信市民及選民嘅眼睛係雪亮嘅，「我同高醫生係朋友，係不可否定嘅事實，大家要信我哋有誠信。」佢強調，即使係爭議性議題，佢都會理性分析，所以支持擱置國民教育科及改革醫院管理局，將來都會同業界好好溝通。
今次潘醫生參選將面對兩位勁敵，包括爭取連任嘅「怪醫」梁家騮及醫學會會長謝鴻興。怪醫話輕鬆面對新人挑戰，對有傳言指潘醫生獲西醫工會過票，佢就話︰「醫生點可以就咁過票，講笑咩，佢哋會獨立思考，自己平常心面對戰情。」