政情：大舞台：林偉強盼陳茂波特赦僭建？

前會計界立法會議員陳茂波（Paul）尋日正式被任命為發展局局長，一直就新界村屋僭建問題同政府撐到行嘅鄉議局，就第一時間話對阿Paul上任表示歡迎。鄉議局副主席林偉強接受電台訪問時仲話，對阿Paul寄予厚望，期望佢喺村屋僭建問題上可以有新思維喎。不過阿Paul尋日見記者時，已講明會對所有僭建一視同仁，依法辦事，暗示鄉議局唔使再妄想政府會特赦村屋僭建。