政情：張華峯報名漏帶身份證
原本諗住競逐連任嘅立法會金融服務界議員詹培忠離奇退選，同佢爭過議席嘅恒豐集團董事總經理張華峯隨即報名加入戰團。不過，俗語有云「輸人唔輸陣」，張華峯尋日係威係勢走去報名，但去到政府總部先發現唔記得帶報名最重要嘅身份證，搞到要即時搵人幫佢返屋企攞證，真係（火羅）爆。張華峯話，當時要用車牌當係身份證登記入閘，好彩選舉事務處職員夠通情達理，等佢張身份證送到後才辦理報名手續。
雖然坊間盛傳詹培忠唔支持張華峯出選，但尋日張華峯竟然搵來詹培忠個大仔詹劍崙撐場助選。被問到詹培忠係咪全力支持佢出選時，張華峯就意有所指話：「我諗佢個個都表示支持，但佢參選時我係佢嘅提名人，我希望佢能夠記住呢一點。」嘩！好似講到要對方飲水思源支持番自己咁。對於張華峯聲稱得到詹培忠支持，詹就回敬話：「我唔批評喇，可能佢到時表現非常標青，令我跌晒眼鏡呢！」金融服務界參選人仲有鄧予立。