政情：KK轉戰超級隨時滅黨
民協上星期突然淆底變陣退選立法會九龍東及新界西選舉，原本循新界西出選嘅廖成利就會返民協老巢九龍西，為譚國僑抬轎，而馮檢基（KK）就會維持轉戰超級區議會議席，佢哋尋日再去報名參選。不過，KK就坦言變陣後嘅選情仍然嚴峻，但民協為咗「有意義生存」及團結泛民主派，所以佢會繼續冒住「滅黨」嘅風險，出選超級議席。至於係邊個可以「滅」咗民協？KK就無交代，但似乎係佢自己亡黨多啲喎。
KK承認，超級議席係一個非常危險嘅遊戲，事關呢個全港性選舉鬥嘅係知名度、資金同樁腳，風險唔少，仲話今次佢哋係冒滅黨風險出選，講到黨之將亡咁，唔通民協會連九龍西呢個老巢都保唔住？但KK一聽到就忽然回神咁話，佢對自己嘅支持者好有信心。對於外界指超級議席最後一席乃KK同民建聯李慧琼之爭，KK就斷言呢啲只係流言，又話「公道自在人心」。至於如果佢選唔到會否退黨？KK就話，佢睇唔到市民要放棄泛民主派喎。
參選九龍西嘅名單仲有梁美芬、黃碧雲、毛孟靜、蔣麗芸、黃毓民、黃以謙、黃逸旭。