政情：白鴿公文袋見席忘義

身為公文袋創黨黨員嘅司馬文，一直向黨表明有意挑戰超級議席，可惜遭黨先後以「國籍問題」及「技術問題」呢兩個荒誕至極嘅理由否決佢嘅要求。司馬文喺上周三中委會上要脅退黨，正當大家以為佢會宣布參選香港島直選，倒戈相向狙擊公文袋時，佢就刻意反高潮宣布唔參加地區直選，聲言唔想分薄泛民主派喺港島區嘅票源。

司馬文退黨 狄志遠扯火

至於超級議席方面，司馬文話目前只得十個提名，相信參選機會非常渺茫。雖然佢話唔會用「失望」來形容自己嘅心情，但從佢淨係呼籲選民支持泛民而非公文袋，再加上佢尋日朝正式向公文袋遞信退黨，睇嚟雙方關係真係無得掹。講到底，司馬文都算係有情有義，只可惜佢入錯一個無情無義嘅政黨。

講到身兼香港家庭教育學院主席嘅狄志遠，因為幾日前話國民教育科唔係洗腦科，隨即被白鴿黨主席何俊仁（鐵頭仁）譴責佢嘅講法違背咗民意及黨內嘅立場，又嚴厲話以佢嘅政治歷練，居然無視社會人士嘅強烈反對同憂慮，除咗要求佢反思及收回言論外，仲話收到黨員嘅投訴，並按程序跟進喎。

聽聞狄志遠聽到鐵頭仁咁講都頗有微言，話黨員與黨意見不一嘅事件時有發生，只要黨員喺發表言論嘅時候表明意見唔代表黨嘅立場就冇問題，唔明白鐵頭仁點解要攞佢嚟開刀喎。其實理由真係極之簡單，就係有人為選票而六親不認，站喺道德高地，借社會議題搵自己人開刀，簡直係想逼黨員退黨保平安，入呢啲政黨真係前世唔修。

參選九龍東嘅名單仲有胡志偉、王國健、陳鑑林、陶君行、黃洋達、謝偉俊。而參選超級議席嘅仲有劉江華、李慧琼、涂謹申、陳婉嫻、馮檢基、白韻琹。