中環出更：陳晴碌友情卡 幫手「跑數」
做善事要有心有力之餘，都要諗吓計仔先至可以籌得更多善款，好似聯合國兒童基金（UNICEF）香港委員會主席陳晴（Judy），現正籌辦十一月「聯合國兒童基金會慈善跑2012」大型籌款活動，為咗擴大善款數字，今屆會增設三公里領袖挑戰賽。呢個組別會廣邀社會賢達參賽，Judy相識滿天下，開到聲當然一呼百應啦！雖然佢係碌友情卡，但就親自寫邀請卡送畀每個老友，咁有誠意，又可以做善事，相信大家都好難托佢手（月爭）。
指毋須標籤國民教育
Judy話，慈善跑當日佢仲會帶埋到時兩歲大嘅囝囝一齊去湊熱鬧，其實依家都經常帶埋囝囝飛去外地開會同探訪，所以佢笑言囝囝都儲咗好多飛行里數。講起最近德育及國民教育科鬧得沸沸揚揚，Judy話自己都好關注事態發展，因為佢好關心囝囝將來嘅教育，所以需要多啲了解事件，睇吓點樣將訊息傳遞，但就認為唔好咁快為國民教育扣帽子同加標籤，遲啲等囝囝大啲，佢會同囝囝講吓國民教育，仲會教佢唱國歌添。