中環出更：鄧振豪開分店名人「賞麵」撐場
父子同心，其利斷金，佳能香港副總裁鄧慶治（Mingo）同囝囝鄧振豪就係最佳寫照。鄧振豪喺短短兩年間，將「豚王」打造成人氣拉麵店，由一個麵檔擴充到依家兩間分店，背後獲得爸爸Mingo嘅默默支持。
上周六佢哋嘅尖沙咀分店舉行VIP日，兩父子跑出跑入忙於招呼賓客，Mingo咁賣力，振豪亦好乖仔氹爸爸話：「我（賺到）嘅咪即係佢嘅」，咁孝順，難怪Mingo都笑言想快啲退休享仔福囉。
鄧慶治做囝囝軍師
Mingo吃得開，喺名人圈內相識滿天下，囝囝開舖，身為爸爸嘅佢無限量為囝囝提供協助，除咗人脈之外，放工後仲做埋客席軍師，所以振豪好感激爸爸嘅支持。上周六搞完VIP日後，「文具大王」杜振源又喺嚟緊周日包場為「小母牛」籌款，所以振豪同班手足會照常開舖，一於為善最樂。
近呢幾個月，零售巿場差咗好多，帶埋太太同囝囝一齊去食麵嘅米蘭站老闆姚君達坦言，近呢幾個月生意忽然靜咗好多，但係舖租就一樣企硬，所以盤數要睇得好緊，但佢預料舖租會慢慢回落。至於喺中港兩地經營瑞士名錶生意嘅陳正欣，就話內地店舖租金同營業額掛鈎，所以經營上有彈性，反而香港零售巿場就停滯不前，佢哋計落都有啲影響，但對前景依然樂觀。
「莎莎」主席郭少明女婿陳振邦亦對前景好樂觀，佢話以前照顧家族清潔用品生意，好多時間都要留喺內地，但做咗爸爸之後，就同哥哥交換基地，依家留守香港可以專心照顧兩個家族嘅業務外，又可以多啲時間陪吓太太同囝囝。不過，佢笑言自己喺莎莎嘅工作同太太好唔同，所以唔可以頂埋太太份工，但係做咗爸爸責任大咗，又啱啱換咗新屋，所以要更加畀心機搵奶粉錢喎。
卓妮