港產官僚辦事拖拉，效率低劣，早就遠近馳名，如果唔係，當年都唔會畀北大人批評「議而不決，決而不行」喇。不過勢估唔到，維修一個噴水池啫，竟然要等足四年，簡直匪夷所思！
話說山頂道花園噴水池損壞多年，早就乾晒塘，康文署○九年起接手管理，一直未見維修，直到接獲查詢先至承認早已得悉問題，明年中可以重開噴水池喎。喂，正如學者質疑，維修噴水池工程一啲都唔複雜，最多只需要一個月就可全面更新，康文署左等右等，死拖爛拖，究竟搞邊科吖？
本報踢爆，原來康文署○九年接管噴水池嘅時候，已經發現機件嚴重銹蝕同老化，需要更換整個系統，點知呢三年來康文署淨係做咗一樣嘢，就係諮詢嘞。諮詢嘅結果係，「決定保留及重開噴水池」，但就要等到年底先至為工程招標，預計明年中完成。即係話，由康文署接手起計，前後花咗四年時間至搞得掂一個噴水池，問你服未。唉，維修普通噴水池啫，你估派太空人登陸月球咩！
大家都知，山頂係香港最具代表性嘅旅遊景點之一，舊年名列最多旅客到訪景點第二位，僅次於尖沙咀星光大道。而呢個早就乾晒塘嘅噴水池，啱啱位於山頂廣場、凌霄閣同纜車站之間，係旅客必經之地，篤眼篤鼻，簡直失禮死人。港府成日話要推廣旅遊，但旅遊景點設施壞咗咁多年都闊佬懶理，你話係咪離晒大譜吖？區議員話齋，噴水池乾塘，山頂少咗啲「生氣」，街坊同旅客都覺得好可惜，多次要求盡快修理，點知康文署大歎慢板，一拖再拖，豈有此理！
唔怪得有人話，港府專養懶蛇，唔踢唔郁，真係一啲都冇講錯。話時話，養懶蛇嘅又點止康文署吖。嗱，好似元朗荔枝山莊霸佔官地十八年，地政總署居然拖足十八年都唔執法，如果唔係審計署踢爆，睇怕幅官地遲早變成私地都似。講起死拖爛拖，水務署都唔執輸o架，最近深水埗有大廈外牆爆鹹水管，水務署接到市民投訴後，竟然拖足一個月至肯派人修理。事實證明，天下烏鴉一般黑，天下官僚一般懶。
梁振英政府話要「穩中求變、適度有為」，睇嚟最需要改變嘅就係官僚作風嘞，今時今日，咁嘅服務態度真係唔得o架。一句到尾，唔該康文署醒醒定定，快快趣趣搞番掂個噴水池，唔好再失禮旅客，丟香港架喇！