政情：中策組「義工」開例會熱身
中央政策組被視為港府嘅重要「智囊」，但梁班子上任近一個月，至今只公布咗中策組首席顧問邵善波嘅任命，三個中策組全職顧問依家仲係懸空，令人以為無人肯加盟中策組。據聞一切其實只係程序問題，其中好大機會任職全職顧問嘅中大亞太研究所副所長王卓祺，尋日仲以「義工」身份出席中策組會議，提早熱身。
中策組尋日舉行例行會議，畀泛民炒到熱烘烘嘅國民教育爭議亦係討論議題之一，但據聞與會者冇乜爆炸性意見，最令人意想不到嘅，反而係王卓祺現身，仲坐咗喺應該畀中策組全職顧問坐嘅位置添。
王卓祺接受查詢時，自稱尋日係以「義工」身份出席會議，又話自己過往間中都有列席喎。問及係咪會做中策組全職顧問，佢就推說要等政府公布，但言談間佢自己已露咗口風，承認可能會以停薪留職形式，保留中大教職同時出任官職。