政情：葉慶寧自詡「齊心」始創人
第四度參選立法會旅遊界功能界別嘅金怡假期董事長葉慶寧（Freddy），尋日高舉寫住「齊心一致撐慶寧、撐旅業」嘅大橫額到政府總部報名。大家見到「齊心」二字，當然諗起特首梁振英（CY）嘅競選口號，不過Freddy就話呢個口號係佢多年前參選時自創，早過CY好多，絕對唔係抄橋。Freddy又否認自己係「梁粉」，但係又喺名下刊物連續三期登CY嘅相，一切盡在不言中喇！
政界盛傳Freddy對手中旅社高層姚思榮得到西環支持，又有旅遊業議會主席胡兆英力挺，但Freddy都唔執輸，搵到前全國政協委員李祖澤同安達旅運江可伯等資深業界人士撐場，並講明專攻中小型旅行社支持。查實唔少業內人士視旅議會支持為票房毒藥，現任旅遊界議員謝偉俊當年都係靠中小型旅行社支持當選，屢敗屢戰嘅Freddy今次爆冷跑出都唔奇。