政情：葉劉製作「客觀」教材擋箭
泛民主派不斷借國民教育問題攻擊建制派，逼對方表態，有個別建制派政黨急起上嚟，竟然「轉軚」公開要求押後推行，失晒儀態。參選港島區嘅新民黨主席葉劉淑儀，尋日就堅稱支持推行國民教育，認為有問題嘅只係個別教材，佢成立嘅匯賢智庫會喺選舉後，自製一套「客觀」嘅教材畀學校同家長參考。葉太咁做，顯示佢都擔心會就有關問題畀泛民攻擊，惟有自製教材用嚟擋箭。
喺英美都留過學嘅葉太尋日舉行花車遊行時指，國民教育幾乎全世界都有，不應標籤為「洗腦教育」，直斥泛民將有關問題政治化：「依家啲資訊咁發達，學生邊有咁易被洗腦？」
談及公民黨阻撓司馬文參選超級區議會，可能會退黨轉戰港島直選，葉太話佢同司馬文都形象中產，難免會分散票源，但佢會堅持講真話，做實事，唔會將啲議題變得誇張同煽情。已報名參選港島區嘅仲有曾鈺成、鍾樹根、王國興、陳家洛、單仲偕、劉健儀、劉嘉鴻、吳文遠、勞永樂、許清安同吳榮春名單。