政情：鄉紳攪局民記隨時仆直

鄉事派同民建聯早喺去年區議會選舉已結怨，最後由後者先勝一仗，但事後西環繼續偏幫民建聯，令一眾鄉紳極度火滾，決定喺立會選舉不論輸贏，都要參選搞事分票。先講新西，本身係商人嘅「第3力量」創辦人陳強，早前喺多名元朗同屯門鄉頭支持下報名參選，加上佢近年經常以成本價出售日常用品畀新西基層市民，令到佢喺社區嘅知名度迅速提升。

地方人士估計，陳強至少會攞到萬幾票，贏就唔多夠，但再加上同樣出選新西嘅屯門鄉委會主席何君堯，想拖死民建聯新西三隊名單譚耀宗、陳恒鑌同梁志祥其中一個，就絕對唔係難事。

新東方面，之前盛傳西環會出手，勸退經濟動力成員邱榮光，以免影響民建聯喺該區嘅選情，但經濟動力同佢本人都多番否認，強調一定會喺提名期結束前正式報名參選。邱榮光鄉事色彩夠晒濃厚，盛傳佢得到同樣屬經濟動力嘅鄉議局主席劉皇發祝福，加上大埔同沙田鄉委會撐腰，同陳強一樣係成事不足，搞事有餘。

陳克勤葛珮帆鬼打鬼

相對外憂，內患更傷。民建聯新東兩張名單，有傳陳克勤名單開始不顧一切搶票，目標係搶夠一成七得票率，使克勤仔連任之餘，拉埋排第二嘅「區會票王」兼「第一梁粉」劉國勳進身立會，置另一隊嘅葛珮帆於不顧，最後更可能兩敗俱傷。喺最壞情況下，民建聯可能只能喺新界東西合共取得三席，比現有嘅四席仲少一席，認真羞家。

已報名參選新西嘅仲有郭家麒、麥美娟、麥業成、田北辰、梁耀忠、李永達、陳樹英、陳偉業、李卓人、曾健成同陳一華名單。新東就仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、龐愛蘭、何民傑、梁安琪同方國珊名單。