中環出更：90後辦保良夜宴快靚正

長輩揼心口支持

呢班行動力十足嘅九十後，好多都大有來頭，其中一位係莎莎郭少明嘅公子郭浩泉（Patrick）。擔任副主席嘅佢，全晚同女友曾天惠跑出跑入，招呼賓客。呢個以「奧運」為主題嘅晚會搞得有聲有色，由構思醞釀到前晚正式開波，籌劃時間前後唔夠半年，加上五月要讓路畀各位同學仔專心考試，所以都幾趕急。

郭少明除咗用公司名義做咗金鑽贊助，又另外買枱支持，拍賣時段仲舉手買咗隻熊公仔，送畀啱啱做咗媽咪四個月嘅大女，絕不放過任何一個可以出錢出力撐囝囝嘅機會。郭太羅桂珍係現任保良局副主席，郭生唔落力點得？不過更重要嘅係，見到咁多位年輕人放假唔去玩，傾點樣做善事幫人，所以郭生都有幫囝囝手做叩門磚，等多啲長輩捐錢行善。至於Patrick姐夫陳振邦，亦有買獎券支持。

保良局主席梁寶珠（左）偕女兒林玉茵一同出席，共襄善舉。	籌委會榮譽顧問林李婉冰（左），有女兒林嘉寶薪火相傳。	主禮嘉賓食物及衞生局局長高永文（左二）與主席何猷亨（左一）、兩位副主席馬嬇安（右二）同李展浩（右一）。（羅錦鴻攝）

有份做今次籌委會榮譽顧問嘅陳正欣話，善款多少唔係今次活動嘅關鍵，而係睇到班年輕人真心為社會付出，而且行動迅速，令佢相當感動。現任保良局主席梁寶珠同前主席劉陳小寶，亦大讚班後生仔做得好。

卓妮