孫子兵法教落，知己知彼，百戰不殆。如果你身為除暴安良嘅警務人員，急欲緝拿色魔歸案，你應該點樣做呢？冇錯嘞，你應該玩一玩角色扮演，盡量代入淫人妻女笑呵呵嘅色魔思維，嘗試理解呢種人渣敗類嘅醜陋心態，最好連佢哋嘅犯罪手法以及逃亡路線圖都瞭如指掌。
功夫茶之所以提到角色扮演，無他嘅，最近旺角淪為魔蹤處處嘅罪惡之城，實在有必要盡一盡好市民義務，向警方拋出唔算係溫馨嘅提示，旺角好多地方非常危險o架，必須加強巡邏撲滅罪行，千祈唔好任由摧花淫賊逃之夭夭。警方加強巡邏有兩個好處，一來防止再有人遇害，二來咯喎，話唔定啱啱遇着剛剛，一轉身就冤家路窄將色魔手到拿來。好似當年賊王葉繼歡被捕咁吖，冇預謀o架，冇部署o架，純粹巡邏警員撞到正咁解。
旺角近日接連發生嘅風化案，講起就心寒咯。同一個屋苑先有七歲女童被非禮，再有中年女子慘遭好色之徒上下其手。跟住落嚟仲得人驚，寂寞女子蒲夜店，被兩名搭訕男子落迷藥之後帶到旺角賓館輪姦，飽嘗獸慾不特止，遇害女子身上財物洗劫一空呀，冇陰功！
旺角點解會變成風化案重災區嘅呢？其中一個原因同地理環境有關。本報記者連夜巡查，發現旺角危機四伏。危機之一係區內有大量「三無唐樓」，三無嘅意思係無大閘、無保安又無法團。好似廣東道同渡船街一帶，色魔容易埋伏於三無唐樓，夜歸女子一不小心就會被拖上天台或者後巷施暴。
旺角另一個危機係後巷零保安，冇保安人員巡邏之餘，又缺乏閉路電視監察。你知啦，天眼呢家嘢好多時候係正義嘅朋友，冇咗天眼變相冇咗天理，緝拿色魔事倍功半o架。
仲有吖，廣東道一帶有露天排檔，檔口與檔口之間有一條通道，係好多街坊嘅必經之途，可惜夜後一片漆黑，色魔藏身其中隨時撲出侵犯獵物。
講到呢度，又係時候同警隊一哥曾偉雄傾下偈。一哥呀一哥，正所謂咯喎，不使霹靂手段，難顯菩薩心腸，你都唔想見到深宵回家俏嬌娃一個二個慘遭蹂躪o架，快啲屯駐重兵巡查旺角圍剿色魔啦。既然旺角後巷零保安，師兄師姐更加有必要密切監視，唔好畀機會禽獸不如嘅大淫蟲為所欲為吖嘛。對付示威者出動胡椒噴霧就話濫用武力啫，如果係對付色魔，功夫茶唔介意你將胡椒噴霧顏射到底囉，最緊要係保護良家婦女免遭狼吻。
嗱，之前警方高調掃蕩九反之地蘭桂坊表現非常好，麻煩一哥再接再厲加把勁，唔好偷懶，殲滅色魔，刻不容緩！