一場十號波，帶來的不是「夜猿嘯山雨，曙鳥鳴江花」，而是吹冧千多棵樹，港鐵跪低，乘客變難民……都話天有不測風雲，之不過，天文台今次活脫脫是「大年三十賣門神——無可再晚」，三號波掛了一整天死唔斷氣，仲放出不靠譜的訊息，話當日改掛更高風球嘅機會不大，誰知下午放工時段，於數小時內一改再改，終於搞到天怒人怨！
「掛波」的確係一種藝術，本報《功夫茶》指摘天文台墨守成規，質疑現時採用嘅颱風訊號早就不合時宜，建議設「五號波」，作為三號風球同八號風球之間嘅緩衝。
功夫茶條暢理清剖析箇中原因，令人佩服！老朽希望天文台察納雅言，知所改進，造福巿民！
由三號波一跳到八號波，恍如心律不正，好易死人！先上五號波，咁就滑順自然好多，彼此有充裕時間準備應變，利己利人，何樂不為？天文台唔好又祭出「以科學為基礎，以服務為目的，以巿民生命為第一考慮」，一味吹水，做唔到實事o架！
一隻烏蠅都可以吹到自己天下無敵：我吃過美味嘅吉品鮑魚，住過山頂望海豪宅，如果我有Mood，仲可以坐林寶堅尼兜風，更可以停留在名模的事業線上，甚至坐喺佢膝頭上添！之不過，佢敵唔過一支殺蟲水或烏蠅拍！天文台吹水敵唔過一場風暴，快快從善如流，唔好食古不化，設五號順滑波，廢九號岩石波，回到以前一、三、五、八、十五種風球，老朽必上其網頁、畀個Like佢！