一本內容偏頗嘅《中國模式——國情專題教學手冊》搞到滿城風雨，雖然高官近日不斷解釋國民教育科只係試行，唔係強推，但效果麻麻，坊間仍然充滿疑慮。相反行政會議召集人林煥光尋日接受電視訪問時，就識得軟銷手法，用其他角度分析事件，先批評《手冊》唔合格，承認好多人擔心「掛羊頭賣狗肉」，教育為名、洗腦為實；之後又向市民派定心丸，話今次件事令整個教育體系免疫，教育局將來亦唔敢接收《中國模式》呢啲次貨，所以搵番佢入行會係有原因嘅。
