政情：白姐姐兩招KO陶君行
社民連陶君行捲土重來參選立法會九龍東直選，但面對人民力量黃洋達及謝偉俊（Paul）夾擊，要贏第五席唔係咁易。為增曝光率，尋日佢帶埋社民連黨友踩上謝偉俊律師樓，諗住玩鋪勁嘅，但勢估唔到出嚟擋駕嘅唔係阿Paul，而係「白姐姐」白韻琹。
阿陶先發炮質疑阿Paul嘅獨立性，話阿Paul每件事都係受到西環指示，白姐姐即刻還擊，話阿Paul律師樓有兩位職員係社民連成員，唔通呢啲又係西環指示？一招已令阿陶氣勢盡失，犀利！點知阿陶繼續狙擊，話白姐姐都係西環嘅人，如果唔係點會贏到區議會，仲參選埋超級議席？白姐姐見阿陶冥頑不靈，惟有再出招，話自己喺社民連會慶時大拿拿捐咗七千元，有晒收據，難道西環中人支持社民連？搞到阿陶即刻回頭問班黨友有冇啲咁嘅事。
阿陶就喺白姐姐呢兩招下即場被擊退，惟有鳴金收兵，約定三日後再戰。參選九龍東嘅名單仲有民主黨胡志偉、工聯會黃國健、民建聯陳鑑林、民協許錦成、公民黨梁家傑及譚香文。