政情：王桂壎搵靚女律師壯聲勢
前律師會會長王桂壎（阿Huen）手執八百二十六個業界提名參選法律界功能界別，畀對手公民黨嘅年輕大律師郭榮鏗（Dennis）多成倍，當中包括多名資深法律界人士，但外界依舊對有多名泛民大狀撐腰嘅Dennis睇高一線。阿Huen尋日正式報名就改變策略，帶咗多名年輕貌美嘅律師撐場，擺明同Dennis鬥搶年輕票源。
阿Huen取得嘅提名重量亦重質，相對Dennis絕對唔輸蝕，包括前大律師公會主席高浩文（Russell Coleman）、資深法律界人士梁定邦、李定國（John Reading），仲有擅長人權法嘅Peter Browns等，凸顯自己唔係只得事務律師支持同忽略人權。
不過以上重量級提名，都比唔上尋日陪佢去報名嘅一眾年輕律師搶鏡，當中最出眾嘅係經常代表律師會上電視講解法律問題、喺高蓋茨律師事務所做咗兩年律師嘅黎蒑（Nadine）。佢大讚阿Huen樂於提攜後輩，今次係自發幫手助選，遲啲仲會陪住阿Huen拜訪律師樓。