政情：事旦男自揭底牌狙擊白鴿
三年前喺六四晚會上一舉成名嘅「事旦男」，多年來一直戴住口罩示人，尋日佢終於肯揭開神秘面紗露出真面目。真名叫何家泰嘅事旦男話，脫下口罩絕對唔係為咗博上鏡，而係想利用知名度收集足夠提名，參加九月立法會港島區直選，狙擊當年唔肯參與五區公投嘅民主黨。
何家泰尋日特別帶同當年高舉嘅「無綫新聞，事事旦旦」嘅紙牌，力證自己係如假包換嘅正牌貨「事旦男」。佢話早前曾經試過周圍去收集提名，但好快就發現戴住口罩問人攞提名實在有啲難度，好多選民都唔敢貿貿然向佢透露個人資料，搞到至今連一個提名都攞唔到。佢又話，雖然唔多鍾意畀外界指指點點，但為咗提名參選，惟有把心一橫除下口罩。
民間團體將會喺嚟緊周日發起反對國民教育科遊行，事旦男話到時會喺維園出發地擺檔收集市民提名。是旦男不斷強調今次係「終極一脫」，又話如果咁都唔可以成功爭取到參選入場券，佢惟有轉趨低調淡出政圈喎。