政情：公文袋白鴿黨搞地下情
缺乏地區工作、冇樁腳可言嘅公民黨（公文袋），本來對參選立法會超級區議會議席雄心壯志，但早前忽然宣布唔玩超級議席，犧牲咗不惜為參選超級議席而放棄自己荷蘭國籍嘅南區區議員司馬文。一直盛傳箇中因由係公文袋同民主黨（白鴿黨）就立法會選舉有秘密協議，但兩黨一直唔肯承認搞「地下情」，直到尋日公文袋好決絕話唔會支持司馬文參選超級議席，令司馬文憤而退黨參選打對台，先撕破兩黨嘅假面具。
香港嘅民主路向來難行，做得泛民主派，團結只屬次要，公平、公開、公正先係核心，可惜公文袋好學唔學，學埋白鴿黨搞秘密協議，靜靜雞同對方協調選舉，退出超級議席選舉，讓路畀白鴿黨派兩人出選，而自己就派人空降新界西，期望唔覺意博到一個議席，真係諗起都作嘔。唔信兩黨咁黑暗？淨係睇白鴿黨主席何俊仁放棄老巢新界西，改派屯門區議員陳樹英出戰就睇到端倪啦，佢唔會覺得陳樹英吸票力強過自己啩？
戰將打對台 自食其果
公文袋方面，一開始就力撐司馬文參選超級議席，後來發現司馬文未必改到國籍，於是改為支持該黨荃灣區議員陳琬琛出選，但當白鴿黨宣布派兩個人參選超級議席時，公文袋又突然話陳琬琛因為工作理由唔可以參選，世事有冇咁巧合呢？公文袋本身放棄參選超級議席，但尋日又正式宣布唔會支持司馬文參選超級議席，又對於司馬文有可能退黨參加香港島直選表示遺憾，擔心影響該黨喺港島嘅選情，如果話該黨同白鴿黨冇秘密協議，真係搵鬼信。
司馬文尋日發表聲明，話「我見到機遇，但黨見到障礙」，下周一就會公布去向。我哋搵過司馬文，佢話目前只得五個提名，仲欠十個提名先至參加到超級議席，反而香港島直選嘅一百個市民提名就已經到手，仲講明一定會退黨參選添。對於公文袋話太急、太遲，唔夠時間準備選舉，司馬文就直斥一切都係廢話。公文袋班人，一向道貌岸然，今次走上密室政治呢條不歸路，搞到戰將憤然退黨打對台，相信最終該黨只會自食其果。