中環出更：孫穎鋼琴送暖 改變貧童命運
「鋼琴公主」孫穎，近年不時巡迴世界各地演出，加上投資「磚頭」有道，早已進身億萬富婆之列，但都不忘照顧中國貧窮一代。近日孫穎與鋼琴大師兼師傅劉詩昆成立慈善基金，計劃送一百部鋼琴到廣東省山區嘅貧窮學校，讓家徒四壁嘅學生，同樣可以在快樂音符中成長。
計劃資助窮學生進修音樂
啟發孫穎展開送暖行動，原來多得一位來自山區嘅音樂神童，神童家貧買唔起鋼琴，每每在電視上觀賞別人彈琴，然後自己用紙板製成琴鍵，憑空想像美妙嘅音符，有次佢膽粗粗參加音樂比賽，估唔到一鳴驚人。孫穎喺電視上目睹呢一幕，心情萬分激動。
孫穎慨嘆時下唔少富家子弟不滿足於窮奢極侈嘅生活，反而生活簡單嘅山區小孩，更懂得珍惜音樂帶來嘅快樂，所以月前決定發起送鋼琴行動，今年底將與數百位義工將鋼琴、DVD機及電視送往有需要嘅學校，並計劃資助才華橫溢嘅窮學生進修音樂。孫穎過去不斷發掘音樂奇才，年前簽下有「小鄧麗君」之稱嘅年輕歌手侯小媛，正秘密練兵，明年就會喺紅館開首個個人騷。