中環出更：楊哲寧愛潛水冀遇太陽魚
夏日炎炎，最啱玩水上運動，潛水係大熱之選。前立法會議員楊孝華公子楊哲寧（Jonathan）自十多歲已迷上潛水，同弟弟楊哲安齊齊考取潛水牌，經常潛入海底窺探海洋萬千生態。Jonathan話，曾經喺馬來西亞詩巴單（Sipadan）見過身長兩米嘅魔鬼魚，又遇見海龜群同鯊魚，嚟緊九月仲想去印尼峇里島，睇吓有冇緣見到罕見嘅太陽魚（Mola Mola）。
閱魚無數嘅Jonathan話，初初見到一隻海龜已經驚為天人，但潛水愈多，就愈難滿足到佢，依家潛落三十幾米，睇住二百幾條巨型魚群喺身邊擦過，感覺奇妙。問Jonathan怕唔怕潛水遇到鯊魚？佢就話冇有怕，皆因鯊魚仲怕過你。佢認為潛水唔難學，最緊要淡定，如果冇晒氧氣，千祈唔好緊張到將個頭極速伸上水面，否則水壓之大，會令身體受傷。Jonathan對潛水嘅熱誠，大到連拍拖三年多嘅女友都受佢感染，加入潛水大軍。
除咗潛水，Jonathan更喜愛充滿挑戰性與速度感嘅運動，小型賽車同越野電單車成為佢讀書時期嘅最佳玩伴。但佢笑言，自從身邊唔少賽車發燒友陸續結婚，少咗人陪佢玩，惟有暫時寓工作於娛樂喇。
鞋店業務將落戶北京
卓妮年前介紹過Jonathan開設嘅鞋店Tassels，唔經唔覺已經開業兩年，有見近期人手縫製嘅皮鞋大受歡迎，佢正計劃衝出香港，喺北京開設首間分店，預料明年初開張大吉。問Jonathan會唔會做埋女裝鞋？佢笑言，男士通常買開一個牌子，唔會轉第二間，所以做男裝鞋生意反而易賺錢喎！
卓妮