售票出錯 追魂Call圖私了
城市電腦售票網職員出錯竟要求市民「返轉頭」擬作私了！有市民早前於大埔文娛中心購買門票，事後卻接獲職員「求救來電」，多番央求協助私下解決問題，令小市民擔心個人資料或遭濫用。康樂及文化事務署雖就出錯向當事人致歉，但學者及公務員團體皆認為事件嚴重影響政府形象，要求加強培訓員工。
嚴小姐（化名）早前到大埔文娛中心以信用卡購買舞蹈表演門票，約一小時後竟接獲信用卡中心職員來電，要求盡快與文娛中心售票處聯絡，事後即遭售票網職員不斷煩擾：「我以為張卡有問題，點知原來係售票處職員入電腦嗰陣搞錯咗張飛嘅付款方法，要我返轉頭拎張飛畀佢改，仲話如果唔係佢就會畀老細炳！」
死纏爛打 擾攘不肯收線
由於嚴接獲來電時已返抵辦公室，無法離開崗位，只能向職員承諾翌日親身返回文娛中心處理，未料該職員竟不罷休，「佢話一定要喺六點半埋數之前要改到，仲話係因為我問佢嘢，佢先會搞錯，仲叫我搵人揸車過去，一直死賴唔肯收線！」擾攘逾十五分鐘後，嚴始能成功掛斷電話，坦言對康文署服務質素的印象大打折扣，「買完飛居然畀人打電話纏住晒，我啲資料都唔知會唔會畀人亂咁用！」
康文署發言人證實，當日有關職員發現售票過程中錯誤選擇付款方法，引致電腦系統內的信用卡交易紀錄與實際不符，遂在未向上級報告下，自行聯絡信用卡中心通知客戶，希望糾正錯誤。發言人又承認，職員有關做法違反購票交易流程守則，並就事件向當事人致歉，強調已對有關職員作出嚴厲訓示及正考慮其他跟進行動，要求職員日後必須嚴格遵守購票交易流程指引，避免犯錯及對顧客造成不必要滋擾。
不依指引 損政府信任度
「做錯事諗住私下了結，好明顯冇跟部門內部指引！」香港城市大學專業進修學院學術統籌宋立功認為，康文署作為面向市民的部門，倘職員未有依足內部指引處理失誤、甚至意圖掩飾，將對政府形象構成嚴重損害，「如果上級唔知道下屬犯咗錯、就改善唔到服務，久而久之市民對政府嘅信任度就會降低！」宋又要求當局加強培訓職員，保持政府優質、廉潔、有效率之正面形象。
公務員工會聯合會總幹事梁籌庭則警告，事件倘處理不善，後果非常嚴重，「件事牽涉到錢銀同市民嘅個人資料，一定要小心處理，唔同上級報告諗住私了，有咩事唔單止畀廉政公署查，甚至會畀人告侵犯私隱！」
記者：黃芷君