香港有唔少「世界第一」，令港人引以為榮，例如香港係世界最自由經濟體、曾經係世界最具競爭力城市、亦曾經係世界第一貨櫃港等等，絕對唔係浪得虛名o架。不過咁，有樣「世界第一」唔單止唔值得高興，簡直令香港臭名遠播，令港人蒙羞添，係乜？之唔係人均垃圾量世界第一囉！
環保團體統計指出，香港人均垃圾量每日高達二點六七公斤，喺全球三十五個發達國家及地區中位列第一，唔止大大拋離第二位丹麥嘅二點二七公斤，更係日本、韓國嘅一倍半，你話羞唔羞家吖。正因為香港垃圾量驚人，點樣處理垃圾已經成為一個老大難嘅問題。呢，尋日有八百名村民圍堵新界西稔灣堆填區出入口，反對當局擴建堆填區計劃，導致交通癱瘓咗三個幾鐘頭。
正如村民話齋，每日大量垃圾及廢料嘅堆填，對區內嘅環境衞生、空氣及噪音造成極大污染，堆填區發出嘅臭味簡直令人忍無可忍；佢哋促請環保署高官兩周內與村民對話，否則不排除將抗議行動升級，隨時再封路。
又唔怪得村民咁勞氣嘅，冇人想日日對住個堆填區，吸埋啲廢氣臭氣，但問題係，除咗堆填之外，仲有乜嘢辦法呢？辦法本來有嘅，咪就係興建焚化爐囉。可惜，擴建堆填區有人抗議，興建焚化爐同樣有人反對，搞到當局進退維谷，束手無策。新任環境局局長黃錦星之前講過，只要源頭減廢做得好，毋須急於擴建堆填區同興建焚化爐。講係咁講啫，源頭減廢無疑好重要，港府喺呢方面一向做得唔夠，不過咁喎，就算做好源頭減廢，仲有大量垃圾始終都要處理o架，現有三個堆填區幾年後就會爆滿，拖拖拉拉唔係辦法喎。
事實證明，香港地少人多，單靠堆填根本行唔通，興建焚化爐避無可避，遲早都要面對。其實，以今時今日嘅科技水平，興建焚化爐並非洪水猛獸，日本、台灣、南韓等地都有成功先例，既環保又可以再生能源，一舉數得添吖。港府環保高官曾多次出國考察，實牙實齒話要興建焚化爐，點知一遇到反對聲音即刻縮沙，關人個關。
講到底，堆填又好，焚化又好，人哋做得到，香港做唔到，皆因前朝政府碌碌無為，胡混度日，拖得就拖。無論點都好，垃圾問題迫在眉睫，新政府接手呢個爛攤子，再唔盡快諗辦法處理，香港就快變成垃圾港嘅喇。