政情：大舞台：新政府運氣麻麻 張建宗當遇氣流
雖然特首梁振英管治香港有心有力，但係運勢就認真麻麻，新班子上任冇幾耐就接連出問題，仲有問責局長要辭職添，認真無奈。順利過渡繼續做勞工及福利局局長嘅張建宗尋日形容，新政府開始運作就好似被「炮火洗禮」咁，猶如「一架飛機，遇上好猛烈嘅氣流，架機有震盪」，又話做官要好似空中服務員咁做足心理準備，事關遇到氣流係不可避免之事。佢咁豁達當然係好事啦，但唔好因為推長者生活津貼及長者兩蚊搭車優惠攞分而沾沾自喜，否則未來遇到更強勁嘅炮火同氣流時，小心扣緊安全帶都坐唔穩呀！
