立法會香港島選區中產票源較多，所以呢區好多參選人都會自詡專業人士作招徠，除咗有職業報稱醫生同大學教授嘅人參選外，原來有「政治家」同精於書法嘅「作家」參選，呢一幕似足「翻版貪曾」對「翻生曾灶財」，由民主黨單仲偕（(先刂)雞）同工聯會王國興領銜主演。其實王國興報稱「作家」尚可理解，齋睇佢平時創作力之高，實在毋庸置疑，再講吖，佢真係出過書嘛，之不過，(先刂)雞自稱政治家就好似少咗啲啲政治智慧喇。
話說當年「貪曾」曾蔭權競選連任特首時，都高調報稱自己係「政治家」，已經廣受劣評，而「政治家」一詞亦隨即成為貪曾專用嘅揶揄貶詞，依家(先刂)雞就飛撲出嚟爭住認做政治家，真係令人啼笑皆非。不過，今屆香港島嘅選情的確會令人覺得幾迷失嘅，除咗自由黨劉健儀同新民黨葉劉淑儀嘅兩女針鋒相對外，仲有人民力量劉嘉鴻、民建聯鍾樹根、公民黨陳家洛，連埋獨立人士勞永樂、許清安及吳榮春，真係夠晒熱鬧。