政情：韋然爆小明下個「目的地」
《小明》系列歌謠紅遍中港，帶挈主唱嘅兒科醫生李家仁人氣爆燈。作詞同作曲嘅「小明之父」韋然就爆料話，好多粉絲為咗一睹李家仁風采，有病無病都去診所行吓，搞到好熱鬧。佢透露小明下一站想去澳門及北京，至於暑假去唔去得成，就要睇吓買唔買到車飛喇！
早前九龍西區各界協會及尖沙咀街坊福利會舉行音樂晚會，擔任協會常務副會長嘅孖人牌代理昌興老闆余壽寧話，同韋然相識幾十年，知佢嘅新作充滿正能量，所以特登搵班義工唱起首歌。
韋然曾創作《何家小雞何家猜》、《月光光》及《氹氹轉》等經典兒歌，好多市民都係聽佢嘅歌曲長大，所以有「兒歌之父」稱號。近年佢創作嘅《小明上廣州》系列，旋律琅琅上口，同樣熱賣。咁小明玩轉廣州、深圳及倫敦之後，跟住會去邊度玩？韋然笑稱，小明心思思想去澳門及北京喎！