政情：高永文驗乙肝 一篤過關
仁愛堂新成立咗一個專門向市民宣傳肝炎知識嘅中心，尋日舉行開幕禮，仲請咗食物及衞生局局長高永文、醫管局主席胡定旭及仁愛堂創辦人、鄉議局主席劉皇發等出席主禮。高永文即場親身示範畀人「篤手指」驗乙型肝炎（乙肝），結果呈陰性，睇嚟高局長除咗通過品格審查外，身體嘅健康程度都通過測試喎。
「手指篤一篤，肝炎無得郁」，高永文尋日去屯門出席仁愛堂程思遠世代無肝炎中心嘅開幕禮時，就親身示範咗畀人篤手指驗乙肝。問到高局長有冇成日畀人篤手指，點知在旁嘅經濟動力立法會議員林健鋒就插嘴話：「佢？畀人篤背脊就多！」高永文於是好大反應話，依家好多檢查都用篤手指嘅方法o架，當然我篤病人手指多啲啦！
咁負責檢驗嘅工作人員手勢點呢？高永文就話，都幾好。佢又呼籲市民要注意自己嘅身體情況，唔同身體狀況要有唔同嘅處理方法。事後結果顯示高永文冇患上乙型肝炎。至於會唔會有抗體呢？在場工作人員就話，如果要知道局長有冇抗體，要再進一步檢驗喎。