政情：陳嘉華剛過檔又傳轉黨
「年輕公職王」豪華飲食集團太子爺陳嘉華（Jeffrey）前排由新民黨過檔經濟動力，為幾年後嘅區議會選舉做準備，當初仲受到高層林健鋒力捧，前途似乎一片光明。點知張櫈都未坐暖，就有消息話佢可能又轉黨喇。
近日Jeffrey喺社交網站facebook上大呻自己經常失眠，似係煩惱纏身。有知情人士同我哋講，原來唔少政黨都想挖佢過檔，甚至有傳新民黨都想佢回巢，仲話執好個位等佢回歸添。
據聞Jeffrey當初加入經濟動力，本想喺新界東搵個選區參選，點知新東除咗現任大埔區議員邱榮光外，一早被民建聯插晒旗，佢變咗搵唔到落腳點。有知情人士話，Jeffrey都後悔當初轉黨嘅決定太倉卒，唔排除會食回頭草，重投新民黨嘅懷抱。
Jeffrey出身飲食界，又係新界總商會成員，兩邊都有唔少人脈，再加上公職多，難怪佢未參選就已經咁搶手。