政情：AO狗仔隊冇晒尊嚴
政府近年屢次推出具爭議性嘅議案，基本上只要冧掂班建制派議員保駕護航支持就搞掂，但有時議員會出現「選舉年候群症」，面對選票唔會咁順攤，所以有時就算為官者用晒兩個口、費盡唇舌都未能成功穩取議員支持時，就要出埋手，呢個就係政務官（AO）「狗仔隊」出動箍票嘅時候喇！不過，有官場中人大嘆，新一代「狗仔隊」愈來愈難做，因為連議員去洗手間都要跟到實，就算將來呢班AO升官飛黃騰達，都擔心難以取得班尊貴議員嘅信任喎！
AO狗仔隊過去頻頻出動深入立法會，憑藉一張圓櫈、一個快勞、一支筆及一個電話，初入行者再加埋一張集齊所有議員臉孔嘅貓紙，滲透喺立法會每一個角落，監察住議員嘅一舉一動，名副其實「總有一個喺左近」。
AO狗仔隊嘅擺位亦係一門學問，除咗立法會嘅出入口呢啲必擺位置，會議前廳門外一段綠地氈亦係廿步一站崗，至於立法會各條走廊盡頭嘅轉角位，更加係一個「戰略性」擺位，貪嗰度可以環視八方、一眼關七。議員同AO狗仔隊朝夕相對後，有議員見到「狗仔隊」日日坐圓櫈坐到腰都痛，亦不禁對佢哋起咗惻隱之心，仲喺行管會建議幫佢哋換番張有椅背嘅櫈，坦言「咁人哋都有阿媽生o架嘛！」
譚志源正名都冇用
堂堂AO被人叫「狗仔隊」梗係唔好聽，就連政制及內地事務局局長譚志源都唔忍心，早前幫AO狗仔隊正名為「全程監察小組」，但正名咗又點吖，有資深AO向我哋訴苦，大嘆新一代「狗仔隊」愈來愈難做。新立法會大樓地方寬敞，同議員玩捉迷藏都唔係咁易，難得見到目標議員，本能梗係要咬住目標唔放，實行「死跟」策略，有時見到議員入廁所仲會為求保險，厚住臉皮問議員「要去幾耐」，工作忘我之際，就連尊嚴亦幾乎可以完全拋開。
本來為咗數夠票數，要低聲下氣都無可厚非，但要AO「乞票」乞到去廁所門口，他日升官再遇相關議員，都唔知有何顏面同對方打交道。不過講到尾，如果政府一早做好政策摸底工作，呢班AO狗仔隊又使咩去到最後關頭先拉票拉到去廁所門口吖！