中環出更：張曼娟新作講座 粉絲逼爆會場
上個月辭官返台灣嘅前光華新聞文化中心主任張曼娟，尋日重返香江為新作《今日香港有煙霞》舉辦講座，來自中港台嘅粉絲逼爆現場，場面墟冚。才女笑笑口話，十幾年前來港舉辦講座，連埋佢全場只得三個人，依家咁多人鍾意睇佢嘅書，真係好開心。
現身嘅名人粉絲有前運輸及房屋局副局長邱誠武夫婦、中華廠商聯合會副會長羅富昌等，完場後，邱誠武仲跟住人龍，乖乖排隊攞偶像簽名添！才女話，香港留畀佢嘅都係美好回憶，仲自爆多年前曾經喺度發生過一段戀情，雖然至今依然單身，但生活好忙、好快樂。
郭位拒失場 探討核問題
邱誠武攞完張曼娟簽名後，就喺落電梯之際巧遇前高官馬時亨（肥亨），兩人隨即握手寒暄一番，邱誠武自稱冇嘢做「量緊地」，大家又笑稱對方係自由人。
卓妮見邱誠武拎住一袋二袋書，於是問佢買咗咩書啦，點知佢懶神秘唔肯講，肥亨於是幫口話：「買o靚模啲書就驚畀老婆鬧啫，正經書怕乜講啫！」後來邱誠武先尷尬話係豐子愷嘅書，都唔知佢驚乜。
另一邊廂，城市大學校長郭位亦有新書出爐，佢係日本福島核事故後，首位應邀訪問日本福島嘅外國安全可靠度專家，尋日佢舉行講座，同過百粉絲近距離齊齊探討核問題，而主持正正就係肥亨。卓妮收到風，原來郭位媽媽啱啱過身，原本佢要留守台灣處理媽媽嘅身後事，但新書講座又一早安排咗，為免失場，佢寧願完成講座後再返台奔喪。
講到教育局局長吳克儉日前秘密訪京冇發新聞稿，肥亨就以過來人身份話，每逢官員訪京，政府新聞處都會「自動波」出新聞稿，駐京辦就好識做咁安排酒店同交通，唔需要官員親自打點，但佢希望大家體諒吓新局長好忙，走漏眼都唔出奇，認為今次事件純粹「蝦碌」喎！
卓妮