年年放榜，總係有人歡喜有人愁，今年係首屆文憑試，情況有冇唔同呢？如果話有唔同，就係名落孫山嘅考生，處境一定會更加愁、更加慘。
愁乜嘢？愁撲位囉。你知啦，放榜之後學生大排長龍撲學位嘅盛大場面，已經同當年市民通宵排隊買樓嘅獨特現象一樣，成為極具香港特色嘅街頭奇景。最令人諗唔到嘅係，莘莘學子為撲位而奔波，並無隨住會考制度走入歷史，反而伴隨首屆文憑試登場而愈演愈烈。
今年七萬幾名考生中，有四男一女考獲狀元，固然可喜可賀，而考獲升讀大學最低資格嘅亦有二萬六千幾人，人數比上年末代會考多出四成，佢哋就未必個個都可喜可賀咯。點解？事關僧多粥少，入圍人數增加，大學資助學位卻無增加，即係話一萬幾個符合入學資格嘅考生只能望門興嘆，你話慘唔慘吖！
嗱嗱嗱，考生成績理想，爭大學學位情況激烈，而成績唔理想嘅考生，爭奪其他出路戰況更加慘烈。職訓局課程一接受網上報名，第一個鐘頭已經有幾百人搶報，搞到系統大塞車，甚至一度死機，你話幾誇張。而恒生管理學院同港大附屬學院等院校，更加出現長長嘅撲位人龍，學生日曬雨淋，爭先恐後，皆因四個字：學位難求。
唉，問君能有幾多愁，恰似考生撲位周街跑。每年放榜，莘莘學子都要面對前路茫茫嘅徬徨焦慮，呢條香港學生嘅求學苦路，幾時至會改善呢？教育官僚話喎，求學不是求分數，喺外國可能係真嘅，喺香港根本係講風涼話。攞少幾分咋，撲位撲到傻，求學唔係求分數，咁又求乜呢？可以咁講，喺現行嘅教育制度之下，學生攞唔到「３３２２２」，求學出路就變成「５３２５４」，唔生又唔死！
話時話，呢幕考生撲位嘅悲涼圖畫，就係香港教育制度千瘡百孔嘅縮影。回歸十五年，教育政策朝三暮四、朝令夕改，一時母語教學，一時語言微調；一時考學生，一時考教師；一時通識教育，一時改變學制，搞到學校無所適從，學生煩不勝煩，教師疲於奔命，家長一頭霧水，全香港都被當局玩到唔生又唔死。
一句講晒，求學不是求撲位，好心港產官僚生生性性，搞好啲教育制度啦。至於各位學生，明知當局靠唔住，就更加要自強不息，發憤讀書。呢，有位住板間房嘅新移民，一樣考到優異成績，證明命運由自己掌握，只要肯努力，老大不傷悲！