發展局局長一職懸空已逾一星期，近日會計界議員陳茂波表明心迹，話如果獲邀出任有關局長佢會義不容辭。正當呢個估局長遊戲快將落幕之際，今日會報名角逐連任立法會工程界議席嘅何鍾泰（Raymond）尋日突然署名發新聞稿，話自己已向港府建議數名合適嘅局長人選，莫非Raymond想透過推薦局長，間接展示自己嘅江湖地位？
Raymond喺新聞稿疑似意有所指話過去一周坊間流傳幾位有意加入問責團隊嘅名字，無疑佢哋過去都為社會作出各種貢獻，但之後佢話鋒一轉，稱讚工程界內有好多出色嘅人士，又熟悉本港大型基建，所以已向港府建議「數名合適人選」，有傳其中一個係同前發展局局長麥齊光背景相似、喺○六年退休嘅前環境運輸及工務局常任秘書長盧耀楨。
話時話，Raymond突然高調建議局長人選，有人估計同立法會選情激烈要爭曝光有關，有人更私下提出反建議，直言工程界今年風起雲湧，由Raymond接任局長就唔使再煩選舉嘅事喎。已報名參選工程界嘅有盧偉國同陸宏廣。