政情：寸舊黨友 黃成智隔空挑機
由一班有理想嘅前民主黨員組成嘅新民主同盟，一直諗住喺立法會新界東攻佔一個立法會議席，尋日佢哋正式報名參選，仲一口氣排出九人名單。呢條以西貢區議員范國威（Gary）為首嘅團隊，有八個係區議員，可以話係最多樁腳嘅一條參選團隊。不過，尋日同時報名出戰新界東嘅白鴿黨黃成智就寸爆新民主同盟，話條隊排咁多人未必係好事，事關好可能會造成混亂喎。
Gary就反駁話，當初佢哋拒絕白鴿黨呢種大佬文化，先至退黨，仲話九人報名有九人嘅好處，咁先凸顯到佢哋嘅團結喎。
不過，佢哋嘅九人名單中，排第九位嘅沙田區議員容溟舟，尋日突然入咗急症室，搞到成條名單報唔到名，要今日再去報多次，認真(火羅)爆。白鴿黨新舊黨員報名已經隔空罵戰，到落區拉票嗰陣真係不堪設想。其他參選新界東名單仲有工黨張超雄、自由黨田北俊、工聯會葉偉明、人民力量陳志全、民主黨蔡耀昌。