政情：林丰揚威 黑英為子驕傲
前天文台台長林超英（黑英）最近喺香港無晒聲氣，原來同太太去咗倫敦聽音樂會。邊個咁有吸引力，令自稱不懂音樂嘅黑英越洋去捧場？原來係佢嘅次子林丰。黑英喺網誌中爆料話，囝囝係專業嘅作曲家，今次應英國廣播公司（BBC）邀請創作樂曲Endless Forms《無盡藏》，當晚由享譽國際嘅BBC交響樂團演奏，係第一位作品得以喺英國夏日逍遙音樂節（BBC PROMS）世界首演嘅香港作曲家，字裏行間掩不住對囝囝成就嘅驕傲。
黑英話，呢個音樂節號稱係世界上最重要嘅古典音樂節，為期一個半月，今年音樂會多達七十一場，而佢囝囝嘅作品就獲安排喺第六場演出，吸引近六千名觀眾入場聆聽。黑英同太太坐喺台下靜靜欣賞，演奏完畢時，林丰由台下跑上舞台接受觀眾鼓掌祝福，黑英話好感動，形容囝囝自細立志做作曲家，經歷現實生活嘅考驗，終於堅持下來。十年磨劍，換來一分鐘光彩，值得終身回味。