政情：情迷高古玉 周國賢愛上歷史
鍾意古董嘅人唔少，但係對有「高古玉」之稱、漢朝以前古玉情有獨鍾嘅，相信就唔多喇！新鴻基地產代理執行董事周國賢（圓圖）就係高古玉發燒友，仲因研究古玉而愛上歷史書，由《資治通鑑》到五經之首嘅《易經》，佢都讀到熟晒。小時候最憎中史科嘅佢仲呼籲年輕人，咪當歷史書係苦瓜，要細味當中嘅甘味喎。
周國賢喺新地出版嘅《讀書好》分享閱讀心得，佢話細個讀書時最無興趣嘅科目就係中史，因為當時老師係個大悶蛋。直至廿幾年前，一位洋人朋友同佢講起上環摩羅街好有趣，於是佢好奇走訪一趟，自此愛上古玉，特別係有二千五百年歷史嘅高古玉。為咗研究當時玉匠雕刻圖樣，佢於是好奇讀起《資治通鑑》，探究戰國時代嘅歷史面貌。
周國賢讀《資治通鑑》愈睇愈有趣，仲極力推介年輕人要讀歷史書，無論係金庸嘅武俠小說，定係柏楊版《資治通鑑》，都有助於現代人引古證今，參透人生，當遇上困境時，相信從歷史裏可以找到出路。