政情：長者津貼撥款 考起政黨
特首梁振英（CY）講明希望喺今年十月初立法會復會後搞掂長者生活津貼嘅撥款，畀合資格嘅老人家「加人工」，但似乎撥款通唔通過仍要等班新議員點頭應承。不過，係咪贊成撥款確實考起班議員，如果好順攤通過贊成撥款就難免被人話急住幫政府收買人心，但如果跟足晒撥款程序，甚至玩拉布拖延審議撥款，令長者等到頸都長，肯定會被市民鬧爆。當中民主黨（白鴿黨）、人民力量同自由黨就講明程序最重要，叫政府唔好因快得慢，睇嚟呢幾個黨都好似預咗被市民鬧爆咁喎！
CY啱啱喺星期一出席立法會特別答問大會時講到，希望今年十月初可以得到立法會財委會撥款六十億元，為合資格嘅長者增加生活津貼到二千二百元，令長者可以喺明年一月開始申請領取生活津貼，有關嘅金額由今年十月計起。不過，負責執行嘅勞工及福利局局長張建宗，都要等議員開水喉放水先至做到嘢，但根據正常程序，政府申請撥款要先到立法會事務委員會討論「過冷河」，再交由財委會通過，但如果直接交到財委會，各黨派議員又係咪同意咁做呢？
三黨講明跟足程序做事
白鴿黨、人民力量同自由黨都異口同聲講到明，政府要跟足程序做事。白鴿黨副主席劉慧卿尋日喺黨團工作年結報告記者會上，仲話新一屆立法會議員最快都要到十月初先宣誓就職，就算嗰日即時選好財委會正副主席，開埋會傾長者生活津貼撥款，都無可能一次過通過撥款。
黨團召集人李華明仲加把口話，成個財委會有六十九個議員，到時啲議員又要求開設另一個小組委員會，再傾多六十幾個鐘嘅話，咪即係無慳過時間，肯定因快得慢。
自由黨主席劉健儀就話，立法會嘅程序唔可以隨便破壞；至於人民力量陳偉業就叫CY要尊重立法會嘅制度喎。不過，民建聯陳鑑林就力撐政府話，既然政策關乎民生，又已經得到社會認同，立法會應該盡快通過撥款，否則會令啲公公婆婆失望，佢又叫啲議員唔好吓吓講程序，用咁多藉口去拖延政府政策喎。最終係咪如CY所願喺十月初通過撥款，咁就要睇吓啲議員係咪急市民所急喇。