中環出更：方劉小梅舉家領紅酒大獎
受惠港府免紅酒稅，紅酒生意大旺，唔少名人都加入賣酒行列，前保良局總理方劉小梅（Helen）嘅老公方杰及千金方淑穎，近日就獲法國頒發「紅酒貢獻獎」，表揚佢哋對法國紅酒文化嘅貢獻。咁高興，Helen舉家親自飛到波爾多領獎，喜上眉梢。
方杰係通用電子前老闆，十多年前進軍法國紅酒業，代理多種知名紅酒。留學美國南加州大學嘅囡囡淑穎，幾年前亦返港幫手，與大哥方仁寬拍住上，不時穿梭法國著名酒莊，搜尋極品佳釀，淑穎年紀輕輕就得獎，認真難得。
順道遊倫敦開眼界
呢個大獎兩年先頒一次，Helen係虔誠基督徒，今次有幸獲獎，覺得好感恩，舉家一於飛波爾多打氣，同行仲有細仔方仁宗添。去到著名釀酒區，靚酒當然任飲，大會喺頒獎禮後設宴款待貴賓，每枱擺放嘅紅酒，多達三十六款，花多眼亂，真係齋飲酒都飽。除咗領獎外，Helen又順道暢遊倫敦，參觀今屆奧運場館，大開眼界。