中環出更：港產陀飛輪 俘虜張宗琪
工藝精湛嘅陀飛輪腕錶，男人總係難以抗拒。卓妮早前行過名店林立嘅中環太子大廈，見到度身訂造頂尖香港名牌詩閣（Ascot Chang）第二代張宗琪（Tony）喺店內打點，無意間見到佢手腕間戴住嘅新歡係港產名牌「萬希泉（Memorigin）」光年系列陀飛輪名錶，盡顯優雅型格，原來佢最近迷上陀飛輪，細心一看，店內一角竟然有靚錶賣添！
原來Tony為咗籌備詩閣明年六十周年慶祝活動，經朋友穿針引線，與萬希泉第二代沈慧林（William）相識。兩人都係浙江人，同聲同氣，William親自操刀為詩閣設計兩款陀飛輪腕錶，作為明年誌慶之用，Tony就喺舖內銷售萬希泉靚錶，齊為紳士名流裝身扮靚。
沈慧林自家品牌受歡迎
「八十後」嘅William出身鐘錶世家，家族喺內地設立錶芯廠已四十年歷史，父親沈墨寧係木雕收藏家，藏有數千件古色古香嘅木雕精品。William自細喺古董及精湛錶藝嘅感染下，品味自成一格，兩年前自創「萬希泉」，推出多款糅合中西文化嘅陀飛輪腕錶，喺全港三十幾間鐘錶珠寶店出售，甚受歡迎。
Tony話，兩款特別版陀飛輪腕錶嘅設計已大功告成，將各生產六十枚，並採用萬希泉獨創嘅機芯刻字技術，將佢爸爸詩閣創辦人張子斌生前嘅簽名刻上，認真稀有珍貴，仲好有紀念價值添。
卓妮