卸任後即鬼祟離港、避走加拿大嘅貪曾，負面新聞依然不絕，老朽一早話，佢想港人忘記佢都幾難！講真，貪曾做唔好份工，市民都睇得一清二楚，佢連盡「公民責任」都唔肯；本報又發現喺加拿大狂掃補藥嘅佢，仍然報住禮賓府，換言之，一家人未改選民登記，即係唔盡市民責任，喺九月去投票選立法會議員，見微知著，其身不正，何以正人乎？
貪曾縮骨治港，大家見慣不怪，最弊佢成日話自己飲香港水，流香江血，其實係舔盡香港油水至真；最近被揭懷疑「明益」貪曾朋友——美國總商會前任主席詹康信單嘢，透過將多幅工業用地重新規劃轉住宅用地，令詹康信從中受惠。
呢件嘢涉官商勾結，如果廉署唔開快勞徹查，就真係一百個講唔通，廉政公署個金漆招牌亦必蒙污！香港嘅核心價值又少一瓣矣！清．康熙深明獎廉與懲貪的重要，他於《廉靜論》指出，「吏苟廉矣，則奉法以得民，不枉法以侵民」。
貪曾避走加拿大，讀者溫先生提供給本報的照片，見到佢愁眉深鎖嘅樣，睇怕唔會因未能盡公民責任、投唔到票而愁腸鬱結吧？老朽想起魏晉名士阮籍《咏懷詩》：「一日復一日，一夕復一夕。顏色改平常，精神自損消……但恐須臾間，魂氣隨風飄。終身履薄冰，誰知我心焦？」貪曾身處異地，未知有否感到本港廉政風暴之凜冽？佢如果晨早祈禱，也許希望神賜力量，證明自己係勁草！