盛傳擔任財政司副司長嘅立法會會計界議員陳茂波（Paul），會接替麥齊光出任發展局局長，阿Paul尋日證實政府搵佢傾過出任局長一事，仲話若正式獲邀，會積極考慮。至於日後重組架構獲得通過後，佢會唔會轉職？阿Paul話，政治一日都嫌長，但強調唔會抱住臨時工心態，會全心全力去做好局長工作。
阿Paul喺電台節目上話，自己喺房地產方面有經驗，曾經喺一間建築及房地產公司工作，亦係一間上市地產公司非執行董事，直認自己係發展局局長嘅適合人選；又話發展局係團隊工作，局內有好多專業團隊幫助推行政策。
被問到特首梁振英（CY）處理屋企僭建問題受質疑，會否擔心CY未能完成五年任期，阿Paul話無諗過呢個問題，過去三星期新班子經歷咗困難時刻，明白社會上部分人抱有懷疑，但希望大家「疑中留情」，給予新班子機會。至於阿Paul屋企有冇僭建問題，佢話已搵人檢查過，認為住宅無僭建，而且亦已通過審查。