政情：發叔借白姐姐 隔山打「琼」
俗稱「超級區議會」嘅區議會功能界別（第二）議席選情激烈，政圈預料最後一席如無意外係民建聯李慧琼（Starry）同民協馮檢基之爭，但謝偉俊嘅另一半白韻琹（白姐姐）前日突然現身報名參選，選情隨即有微妙變化，因為有傳獲得多名元朗同大埔鄉事派提名嘅白姐姐，入場參選係獲得鄉議局主席劉皇發（發叔）嘅默許，藉此向有牙齒印嘅民建聯示威。不過，白姐姐就話唔好咁多陰謀論，強調「情場如戰場，選場都如戰場」喎！
五個超級區議會議席係兵家必爭之地，工聯會陳婉嫻、民建聯劉江華、李慧琼前日選舉提名期一開始就搶閘報名谷人氣，點知白姐姐同日亦手持十七個區議員提名報名參選反搶傳媒嘅注意。
提名來自鄉事派經濟動力
我哋尋日翻查白姐姐嘅提名人名單更有驚人發現，唔少提名區議員同發叔都有直接或間接嘅連動關係，首先元朗六鄉至少有四名議員包括沈豪傑、黎偉雄、以及經濟動力多名扎根大埔及沙田區嘅議員陳灶良、劉偉倫都有份補送白姐姐入場，甚至連已退出人民力量嘅麥業成都係提名人。
眾所周知，發叔係鄉事派同經濟動力嘅核心，如果冇佢默許相信唔敢亂咁奉上提名票畀人。我哋問過幾個鄉事派中人知否箇中因由，有鄉紳估計可能同本身係元朗人嘅謝偉俊有關，有鄉事派則開宗明義話多元政治係好事，表明唔想畀民建聯獨大喎！
對於有傳發叔背後發功撐白姐姐打民建聯嘅傳聞，白姐姐接受查詢時多次強調唔好咁多陰謀論，又話謝偉俊幾代都係原居民，所以互相支持，重申參選就係為咗唔想議席被人壟斷喎。
講開發叔，廿七鄉尋日已聯署撐佢角逐連任立法會鄉議局功能界別議席，鄉議局副主席張學明表明論人脈、才能、見識同膽量以發叔最好，所以支持佢參選。不過，獲得推舉嘅發叔未有一口答應，話要諗吓並且同家人商量吓，下周就會有決定。唔知大家信唔信發叔會唔連任呢？睇怕機會微乎其微。